Flash News

Berisha: Raporti i OSBE përmbys zgjedhjet, të përgatitemi për protesta

E zuri kali poshtë, humb jetën 62-vjeçari në Maliq

Berisha: Universitetet po shkojnë drejt sistemit selektiv si në diktaturë

Kuvendi nis me një minutë heshtje për efektivin e vrarë në veri të Kosovës

Abuzimi me fondet e IPARD, Rama e pranon: Do të korrigjojmë administrimin e fondeve

KRYESORE

Hetimet për Michael Flynn në SHBA, zbulojnë lidhjet e LSI-së së Ilir Metës me Rusinë

Politiko 28 Qershor 2017, 09:50

Hetimet për Michael Flynn në SHBA, zbulojnë lidhjet e LSI-së

Në Shtetet e Bashkuara të Amerikës është duke u zhvilluar një hetim i rëndësishëm kundër ish-këshilltarit për Sigurinë Kombëtare, Michael Flynn, i dorëhequr pak javë pasi u emërua në këtë post nga presidenti Donald Trump. Flynn akuzohet se ka lidhje të ngushta me Moskën dhe ka pranuar ndikime ruse gjatë fushatës presidenciale.

Por ky hetim që rrezikon të prekë edhe kreun e ‘Shtëpisë së Bardhë’, ka hedhur dritë mbi disa zhvillime në Shqipëri dhe Europën Lindore.

Agjencitë e lajmeve Politico.eu dhe ProPublica kanë publikuar së fundmi një artikull investigativ ku shpjegohen lidhjet e Flynn me një person që dyshohet se është agjent rus, Dmitri “David” Zaikin. Në fakt, Zaikin pretendon se është hebre me origjinë nga Ukraina, por lidhjet e tij në biznese, kryesisht të naftës, të çojnë sipas këtyre dy mediave në Kremlin.

Bashkëpunimi i David Zaikin nuk lidhet direkt me Flynn, por me lobistin turk Ekim Alptekin, emri i të cilit është tashmë i njohur për publikun amerikan pasi hetimet deri këtu janë publikuar prej kohësh në media.

Nga investigimi rezulton se disa parti politike në Shqipëri dhe Maqedoni kanë përdorur kompani amerikane për të forcuar bashkëpunimin me lobistë që kanë marrëdhënie dhe lëvizin drejt linjës së bashkëpunimit SHBA-Rusi.

“Investigimi i ProRepublica-Politico ka zbuluar se ekziston një bashkëpunim i gjatë me biznesmenë rusë dhe zyrtarë qeveritar, kryesisht të përfshirë në marrëveshje energjitike dhe miniera. Kohët e fundit, Zaikin ka patur bashkëpunime politike në Europën Lindore, duke këshilluar pari në Shqipëri dhe Maqedoni që kanë lëvizur drejt Kremlinit”, shkruhet në artikull, raporton Politiko.al.

Një ish-bashkëpunëtor i tij, britaniku Geoffrey P. Cowley ka rrëfyer: “Kur ishte me mua, edhe pse nuk ishte qëllimi im, ndodhte që unë të shikoja me kë bisedonte në telefon dhe ishin zyrtarë nga Shqipëria, Serbia dhe Guinea. Kjo nuk ndodh shpesh me një hebre që është larguar si refugjat nga Ukraina dhe nuk ka njohje”.

Zaikin dhe Cowley hapën së bashku një firmë këshilluese dhe aty ukrainasi promovohej se kishte “një rrjet kontaktesh me president dhe zyrtarë të lartë qeveritar në Senegal, Nigeri, Gana, Guinea, Etiopi, Shqipëri, Sierra Leone, Mali, Liberi, Moldavi, Ukrainë, Kazakistan dhe Rumani”.

“Disa vite më vonë, karriera e Zaikin mori një hov të ri. Pas punës me pasuri të patundshme dhe në sektorin rus të energjisë, ai u bë këshilltar për partitë në pushtet në Turqi, Shqipëri dhe Maqedoni. Ai nisi të punonte me këto parti për të krijuar lidhje në SHBA”, thuhet më tej në artikull.

Këto media raportojnë se gjatë kohës që punonte me Turqinë, David Zaikin gjithashtu ndërmjetësoi marrëveshje me VMRO-DPMNE në Maqedoni dhe Lëvizjen Socialiste për Integrim në Shqipëri, bazuar në dëshmitë e katër personave që kanë informacion për këtë çështje. Zaikin i ka prezantuar liderët e dy partive me lobistë dhe këshilltarë fushatash në Amerikë, që kanë lidhje me Kremlinin.

“VMRO, njësoj si Turqia, historikisht ka lidhje me Perëndimin, por së fundmi ka ‘hyrë’ në Kremlin. VMRO prej muajsh refuzojë të zbresë nga pushteti edhe pse dështoi në dhjetor të fitonte mandatet e nevojshme për të krijuar mazhorancën parlamentare. Kjo e ka vënë partinë në kundërshtim me DASH, por ka marrë mbështetje të fuqishme nga Ministria e Jashtme e Rusisë. LSI-ja e Shqipërisë dhe lideri i saj Ilir Meta, janë pro-perëndimorë, por ndonjëherë janë përplasur me Departamentin Amerikan të Shtetit për presionin e SHBA-së për të çuar përpara reformën në sistemin kriminal të drejtësisë”, shkruajnë ProPublica dhe Politico.

*ProPublica është një organizatë jofitimprurëse që prodhon lajme investigative. Në vitin 2010-të u bë agjencia e parë online e lajmeve që fiton çmimin prestigjoz “Pulitzer”.