Plagët e pambyllura të 26 Nëntorit nga propaganda, familjet e pastreha ende në udhëkryq

26 Nëntor 2019. Tërmeti i fuqishëm me magnitudë 6.4 me një epiqendër 16 kilometra në perëndim-jugperëndim të Mamurrasit goditi Shqipërinë 4 vite më parë, duke i marrë jetën 51 personave dhe duke lënë të plagosur mbi 3.000 të tjerë.

Qytetet më të goditura ishin Durrësi, Thumana, Tirana dhe Lezha. Asokohe qeveria u zotua se do të bënte çmos për të ndërtuar pallatet dhe banesat e rrënuara nga tërmeti.

Kanë kaluar 4 vite dhe përveç propagandës qeveritare të Ramës, shifrat dhe faktet e grumbulluara nga investigimet flasin të kundërtën e premtimeve televizive që ka bërë kryeministri për të prekurit nga tragjedia e 26 nëntorit.

Propaganda e Ramës

Sot, kryeministri si çdo vit pas 26 nëntorit 2019, ka ndarë disa pamje nga Thumana e rregulluar. Me krenari, Rama e cilëson një arritje të qeverisë së tij. Por, fasada fsheh pas vetes një tjetër realitet.

Kryeministri këmbëngul se qeveria e tij ia doli të rindërtonte në kohë rekord banesat dhe pallatet e dëmtuara, duke harruar se shumë të tjerë enden dyerve të bashkive me letra në duar, për të përfituar bonusin e qirasë dhe apartamentin e premtuar, të cilin ende nuk e kanë marrë.

7 familje në Lezhë pa çati

Një vështrim i Faktoje.al në Lezhë, një nga bashkitë e goditura nga tërmeti i 26 nëntorit, tregoi se disa familje vijojnë të mbeten pa çati mbi kokë. Të paktën 7 të tilla, deklarojnë se edhe pse kanë kaluar 4 vite nga tragjedia, nuk kanë një strehë.

Pallati 71 në rrugën ‘Luigj Gurakuqi’ u shemb dy vite më parë, por ende nuk kanë nisur punimet për rindërtimin e tij. Procesi ka mbetur peng i zbatimit të marrëveshjes së rindërtimit nga Fondacioni Firdeus, pasi palët nuk kanë gjetur dakordësi.

Bashkia e Lezhës tha për Faktoje.al se çështja është adresuar në qeveri. Pas tërmetit, nga vlerësimi i dëmeve në këtë bashki u raportua 246 familje të pastreha, mes të cilave edhe banorët e një pallati tre katësh në qendër të Lezhës.

Tre muaj pas tërmetit, kryetari Pjerin Ndreu, premtoi rindërtimin e pallatit 71 në lagjen Besëlidhja, e megjithatë, rindërtimi ende s’ka nisur. Bashkia nuk është në gjendje të japë një afat mbi fillimin e punimeve edhe pse kanë kaluar katër vite nga tërmeti tragjik.

Por, kjo mungesë financimi e pretenduar nga Bashkia e Lezhës, ka lënë pa bonus qiraje 7 familjet e goditura nga tërmeti që presin në qiell të hapur për një shtëpi.

Durrësi ende në udhëkryq

Shumë familje kanë arritur të futen në banesa të reja në Durrës, ndërsa 2400 të tjera janë pa shtëpi. Madje prej muajsh nuk trajtohen as me bonusin e qirasë.

Vetë banorët pohojnë se mungesa e financimit nga ana e qeverisjes vendore, ashtu siç ishte premtuar, po iu shkakton një krizë të thellë jo vetëm ekonomike, por edhe sociale. Shumë prej tyre janë detyruar të kthehen në banesat e pariparuara ose të papërfunduara, duke rrezikuar veten.

“Ka vend për gëzim, thjesht ideja që po kthehesh në shtëpinë tënde, po kur në një javë kalon në kurriz ngjitjen nëpër shkallë me fëmijë, me qese nëpër duar nuk ka vend shumë për gëzim kur përballesh me realitetin. Nuk mund të bëhet kolaudimi i pallatit pa u bërë ashensori, vendosur kangjellat e shkallëve. Siguria është zero. Ne banojmë aty dhe është shumë problem, por hymë se qiratë janë shumë të lartë dhe s’mund të përballohen më. Që në mars nuk e kemi marrë bonusin”, ka thënë një banore për Top Channel.

Në Manëz ndërtimi i lagjes së re përfundoi, ndërsa në Spitallë të Durrësit punimet vijojnë. Strehimi vazhdon të mbetet problemi kryesor. Disa nga banorët shprehen të shqetësuar për mungesën e energjisë elektrike dhe ujit.

“Çelësat i morëm, kemi 2 javë, po kot. S’kemi ujë drita. Vijmë, shohim dhe ikim”, thotë një nga banorët.

“Në bashki na thonë i kemi çuar emrat te elektriku, atje thonë s’kemi matës. Si bëhet kolaudimi?! Asnjë s’ka hyrë”, shton një tjetër.

Fajtorët fituan lirinë

Të gjithë ata që u arrestuan si fajtorë për shembjen e pallateve dhe banesave, nën akuzën e shpërdorimit të detyrës e deri tek vrasja për shkak të pakujdesisë, u lanë të lirë.

I vetmi drejtues i lartë që qëndron pas hekurave i hetuar nga SPAK për “shpërdorim detyre” për rastin e një pallati të vetëm të dëmtuar nga tërmeti është ish-kryebashkiaku i Durrësit, Vangjush Dako. Ky i fundit u arrestua në qershor të këtij viti.

Nga 30 të arrestuarit në total, Gjykata Penale e Tiranës vendosi të linte në burg 7 prej të arrestuarve, mes tyre ish-kryetarët e komunave të Farkës e Kasharit Fatbardh Plaku dhe Besnik Fuçia.

Detyrim paraqitje

1-Anila Harxhi- Detyrim paraqitje

2-Reis Muca- Detyrim paraqitje

3-Merita Kushe- Detyrim paraqitje

4-Hekri Disha- Detyrim paraqitje

5-Bukurie Halili- Detyrim paraqitje

6-Adhurim Qehajaj- Detyrim paraqitje

7-Stela Maze- Detyrim paraqitje

8-Zhaneta Tagani-Detyrim paraqitje

9-Shpëtim Kërçiku- Detyrim paraqitje

10-Jan Ikonomi- Detyrim paraqitje

11-Ermir Cina- Detyrim paraqitje

Arrest shtepie

1-Faik Fejza- Arrest shtëpie

2-Ndoc Pepkolaj- Arrest shtëpie

3-Mehmet Felahi- Arrest shtëpie

4-Agim Eski- Arrest shtëpie

5- Pëllumb Korfuzi- Arrest shtëpie

6- Qiriako Gjergo- Arrest shtëpie

7- Asqeri Xhanari- Arrest shtëpie

8- Vjollca Hoxholli- Arrest shtëpie

9- Ali Dyrmishi- Arrest shtëpie

10- Shefqet Doda- Arrest shtëpie

11- Gerti Qalliku- Arrest shtëpie

12- Luan Beta- Arrest shtëpie

Arrest me Burg

1-Hodo Gjoni arrest burg

2- Artur Skela- Arrest meburg

3- Fejzi Dyrmishi - Arrest me burg

4- Besnik Fucia, ish-kryekomunari i Kasharit- Arrest me burg

5 -Naim Shehi- Arrest me burg

6- Gezim Shkalla - Arrest me burg

7- Fatbardh Plaku, ish-kryekomunari i Farkes- Arrest me burg