Ditari i Rezistencës/ Dita 21 e Kiametit
Koloreto Cukali
Kurorë-frika
Një nga shqetësimet më të mëdha që po artikulohet sot në botën e lirë është fakti që frika nga kurorë-virusi po ngre nevojën e marrjes së masave të paprecendenta, dhe në këtë rast, liderë populistë po përfitojnë për të përqendruar dhe më shumë pushtet në duart e tyre.
Një prej tyre është Viktor Orban, në zemër të Europës që po e përdor situatën për të ndërtuar përfundimisht një mbretëri ku ai është mbreti i padiskutueshëm. Në Parlament Partia e tij Fidesz ka shumicë absolute dhe merr vendime edhe anti-Kushtetuese, Orban mund të qeverisë tashmë vetëm me dekrete që nuk ka kush i konteston, ai mund të fusë tashmë në burg gazetarë që Ai konsideron që përhapin lajme “të rreme”; i vetmi informacion zyrtar vjen vetëm nga zëdhënësit Qeveria, dhe mediat e analistët pro tij janë mese dakord që kjo të ndodhë. Kjo situatë, është pa afat. Nëse shtete si Britania apo Franca masat që kanë marrë i kanë me afat (2 muaj në Francë) në Hungari ato mund të zgjasin përjetësisht.
Këtu mund të ngremë 3 pyetje:
Me çfarë ju ngjasojnë metodat e Orban-it?
A po qeveris akoma “byrazeri” në Ankara akoma me ligjin e gjendjes së jashtëzakonshme pas grushtit të shtetit të para 4 viteve?
Dhe, a ka përfunduar gjendja e emergjencës e shpallur për tërmetin e Nëntorit nga qeveria Rama?
Shqipëria mes tërmetit e Covid-it
Mënyra më e mirë për të mbajtur një popull nën zgjedhë është frika. Ne e kemi provuar për 45 vjet, por kjo nuk do të thotë që kemi imunitet.
Frika nga kurorë-virusi është thelbësore dhe unë kam parë me trishtim që ka shumë njerëz, të gatshëm për të “tregtuar” frikën se mos vdesin me heqjen e lirisë. I kuptoj, por, gjëja që frika nuk i le të kuptojnë është që heqja e lirive nuk garanton mbrojtje më të mirë ndaj virusit. Kjo frikë po pasurohet dhe me “lajme” të paverifikuara si puna e policisë spanjolle që rrihte protestuesit, apo dhe videove që qarkullojnë me gjoja tanke në mes të New York-ut, video që nuk kanë asnjë vërtetësi. Unë e lexoj NY Times e The Guardian përditë, dhe kur flitet për “futje të ushtrisë” bëhet fjalë ose për angazhim të spitaleve/mjekëve ushtarakë ose për ndërhyrje humanitare (si në Itali ku ushtria po transporton të vdekurit) dhe jo për show dhune si diagaçët në bulevardin Dëshmorët e Kombit. Me fjalë të tjera, këto lloj lajmesh, për tanke në Londër apo në NY, qarkullojnë vetëm në hapësirën virtuale shqiptare.
Frika e kombinuar me PR (që në rastin e fushatave të z. Rama do quheshin shqip: vetëreklamë) të përqendruar mund t’i japin një lideri autokrat edhe më shumë pushtet nga sa aktualisht ka.
Pak ditë më parë qeveria shqiptare mori dhe kompetenca që janë shqetësuese: të drejtën për të tu futur në shtëpi pa urdhër gjykate, për të të marrë pronën e për të të ndaluar protestën nëse të heqin paligjshmërisht nga puna (grevat)!
Por, arsyeja pse po e risjell “frikën” si argument është një tjetër.
Frika e një grupi më të vogël njerëzisht, që falë PR-it (vetëreklamës) dhe frikës masive, Kryeministri do të mbajë pushtetin edhe prej faktit që pjesa më e madhe e shoqërisë po trajtohet “si dele”.
Ka një ide që 5% e popullsisë është e vetëdijshme për batakun ekonomik e politik, për humbjen e lirive civile e të pronës publike, për një shtet që tashmë qeveriset me Ajfon e Uatsap, për një realitet të manipuluar thellësisht nga propaganda dhe me liri shprehjeje të cunguar, por z. Rama mund të qeverisë lirisht përjetësisht falë manipulimit të 95%-shit tjetër.
Ky, është një debat i rëndësishëm.
Kurorë-reklama
Të tërë e mbajmë mend gjetjen e Ramës që të shfaqej në protestën e solidarizimit me viktimat e Charlie Hebdo-së në Paris, ku tërhoqi me vete si dekor dhe përfaqësues fetarë. Një nga gjetjet më të mira të tij publicitare.
Por, i njëjti person që protestonte kundër dhunës ndaj medias në Francë ka disa vjet që është një nga armiqtë më të mëdhenj të medias, që e ka tejkaluar në nivel Orbanin, Vuçiçin dhe despotët e tjerë të lindjes pas-sovjetike. Kam patur rastin që të verifikoj nga afër dhe përimtësisht strategjinë denigruese, shpifëse, gënjeshtare, keqinformuese e manipuluese të tij në rastin e ligjit të medias, të përforcuar nga një fushatë e gjerë PR-i dhe një lumë oborrtarësh. Mosmiratimi i atij ligji, është prapë një nga kushtet për hapjen e negociatave.
Brenda vetë partisë së tij, njoh njerëz që bien dakord që ai për PR (shqip: vetëreklamë) është më i miri dhe po të njëjtët njerëz e pranojnë që ai ka një problem të vogël: nuk di të bëjë shtet. Por, PR-i i Ramës në krahasim me “3 lapsat” tani ka shkuar në citime imamësh (që dalin të jenë terroristë), në fjali të tipit “thuajini zotit faleminderit që më keni” dhe deri tek qeshakja si veshja e 30 mjekëve me maska pune që në Rinas.
Ka vërtet një frikë që z. Rama po e karikon frikën dhe masat pasuese për Covid-in (ku nuk ka asnjë meritë personale, për sa kohë janë masa standard të kërkuara nga OBSH) për të ndërtuar në fushatë politike që ngulit idenë se ai është “babai i kombit” dhe pa të jemi të mbaruar. Edhe përdorimi i skajshëm termave “jemi në luftë” ndaj një “armiku të padukshëm” tenton të ndërtojë imazhin e prijësit trim e luftëtar në raport me terrorin që ngjallin po këta terma në publik. Në fakt, ne nuk jemi në luftë, dhe armiku i vërtetë është sistemi shëndetësor i shkatërruar dhe mungesa e ventilatorëve.
Kjo fushatë është e orientuar për atë që do të ndodhë pas Covid-it.
Kurorë-mbreti
Kur të ketë kaluar situata, nuk ka rëndësi një muaj apo një vit, Shqipëria do dalë lakuriq ashtu siç është: e dregosur ekonomikisht dhe e zhveshur nga liritë politike e civile.
Në një analizë z. Genc Burimi argumenton që intensiteti i propagandës po ndërton justifikimin për nesër që të mos kemi gojë t’i kërkojmë llogari për ekonominë kurorë-mbretit, kurorë-babait që na mbrojti nga rreziku i kurorë-virusit.
Ndaj, detyra e atij 5%-shi sot nuk është të bjerë në pesimizëm as të mendojë që beteja për të mbrojtur liritë është e humbur. Përballë manipulimit prej frikës e propagandës së 95%-shit, ajo pjesë që nuk manipulohet dot duhet të vazhdojë të flasë, të argumentojë e të mbajë gjallë të vërtetën tjetër, atë që tiranët duan ta zhdukin me propagandë e ta mbysin me frikë.
Sigurisht, kjo betejë për lirinë nuk ka përballë vetëm propagandën megjithë obvorrtarët e lakejtë, por dhe reagimin e një publiku të terrorizuar nga frika e që linçon në emër të frikës këdo që ngre pikëpyetjet për lirinë. Por, e vërteta duhet mbajtur me çdo kusht e duhet bërtitur fort. Që kur të dalim nga kjo situatë, tirania të mos shndërrohet në një makth tjetër akoma më të gjatë.
Kur e gjitha të ketë mbaruar, do shihet çfarë ka mbetur nga një ekonomi e shpërdoruar prej vitesh e nga një shtet kartoni.
Nëse z. Rama për propagandë citon Anwar al-Awlaki-n, unë preferoj Nolin: “Se pas vdekjes ndriti jeta, dhe kudo gjëmon trumbeta…” Asaj trumbete duhet t’i biem që tani, në mënyrë të vazhdueshme e sado pak të jemi.
Financuar Nga Bashkimi Europian
