Flash News

Evazioni fiskal i ‘Bankers’, lihet në burg CEO kinez dhe ish-drejtori

Përplasen dy makina në aksin Sarandë-Delvinë, 4 të plagosur

Alarm për bombë, Policia largon deputetët dhe mediat nga ndërtesa e Kuvendit të Kosovës

“Vullneti i popullit” dhe ironia e dorëheqjeve të komanduar

Përfundon pa ndryshime rinumërimi i votave në Durrës

KRYESORE

Me Top Channel, Ben Blushi bëhet 'parti e parë'

Politiko 28 Janar 2018, 19:51
Me Top Channel, Ben Blushi bëhet 'parti e parë'

Alfred Lela

A do të shkojë apo jo Ben Blushi te Top Channel? u kthye në një prej kureshtjeve urbane të javës që u mbyll. Lajmi i një negociate mes tij dhe Vjollca Hoxhës ka qarkulluar në mënyrë informale, por nuk është bërë zyrtar nga asnjë prej palëve të përfshira.   

Politikani i majtë hoqi dorë nga kryesimi i partisë së re LIBRA, krijuar vetëm para pak muajsh si reagim ndaj hapësirës së kufizuar në Partinë Socialiste, deputet i së cilës ishte në legjislaturën e kaluar. 

LIBRA arriti të mblidhte vota, aq sa për të shënuar emrin si partia e pestë në vend, por pa prodhuar trysni të mjaftueshme që do t'i jepte një karrige parlamentare. Përveç 20 mijë votave që i thanë opinionit publik se partitë anti-sistem nuk janë ende të mirëpritura në Shqipëri, LIBRA shënoi edhe një rekord shpejtësie. Pak muaj pas krijimit dhe sprovës elektorale, ajo u ndesh me një skizmë të provokuar nga mospajtimet mes dy protagonistëve: Ben Blushi dhe Mimoza Hafizi.

Blushi mund t'i rihapë një ditë 'faqet' e LIBRA-s e të futet në to por, me gjasë, jo Hafizi, e cila u shkarkua nga Bërthama, një emër tjetër për kryesinë e partisë së re. Në njëfarë mënyre ky precedent sinjalizon se sa e madhe është pesha e njerëzve publikë dhe me kontribut të publikes.

Në ndeshjen Blushi vs Hafizi apo çdo match të ngjashëm, fiton gjithmonë Blushi. Kjo nuk është misogjini, por fakt. Faktet, në anën tjetër, mund të jenë misogjinike, por është burracakëri dhe jo burrëri të ndeshesh me to panevojshëm, sa për të qenë politikisht korrekt.

Kjo është historia e LIBRA-s dhe e dy personazheve të saj, Blushit dhe Hafizit.

Çfarë përmban e ardhmja për gazetarin e shndërruar në politikan? A do t'i kthehet ai gazetarisë, në një pozicion të lartë menaxherial, apo do të mbyllet në 'kullën e fildishtë' duke iu dorëzuar asaj tjetrës, letërsisë, që është në fjalët e përmbysura të Heminguejit, 'gazetari pa nxitim'?

Rasti i Blushit në rolin e një kryemanxheri në Top Channel është më shumë se vojerizëm mediatik dhe urban. Duke bërë këtë lëvizje 'interesante' në nivelin e parë, Blushi shpërfaq disa shtresa balancuese në një sistem politik dhe mediatik të zhbalancuar seriozisht.

Ai shkon në Top Channel si një profesionist, duke u bërë rasti i parë në Shqipëri kur një personazh me profil të lartë bën rrugëtimin e kundërt, nga politika drejt medias. Shumë gazetarë e kanë përdour median  si kaluç për të kaluar në anën e politikës.

Ben Blushi shkon me bagazhin e rëndë të përvojës së gazetës Koha Jonë, e cila i bëri rezistencë Berishës së parë. Për KJ dhe Blushin mund të thuhet se qenë pjesë e mekanizmit që rrëzoi Berishën. Gazeta, Blushi dhe Edi Rama ishin aleatë asokohe.

Nëse Blushi shkon te Top-i ai bashkon armët me televizionin më të madh në vend, në një luftë gjithaq të lavdishme kundër Ramës së tretë, sa ajo ndaj Berishës së parë. Si Vjollca Hoxha, ashtu dhe Ben Blushi kanë një interes: matronja e Top-it me politikanin e majtë në krye, mund të mbetet televizion i parë, ndërsa Blushi me Top-in mund të bëhet 'parti e parë'. Figurativisht kjo e fundit, por televizioni do ta ndihmojë Blushin që të shihet si instrumental në dobësimin dhe rrëzimin e Ramës duke mos i lejuar një mandat të tretë.

Të dyve iu duhet ky partneritet dhe, me anë të tij, Vjollca Hoxha mund të dëshmojë se arriti të merrte vendimin e parë të madh dhe domethënës, që prej qershorit të vitit të shkuar, kohë kur shtiu në dorë e vetme frenat zotërues të Top Channel.

Ikja e Blushit te Top-i është një lajm i mirë edhe për profesionistët. Një prej shqetësimve rraskapitëse të politikanëve të mbetur pa aulat e politikës, kur lihen jashtë listave nga kryetarët apo futen në kurse përplasjeje me ta, është 'çfarë të bëjmë tani?'. Sepse, një pjesë e madhe e tyre nuk bëjnë dot asgjë përtej ecejakeve nga salla e Kuvendit te kamerat dhe studiot e televizioneve. Shumë syresh janë futur në politikë pa një profesion (janë ndeshur pa dashje me kryetarin), dhe një pjesë tjetër kanë qenë amatorë ose mediokër në profesion.

Blushi u jep një shenjë profesionistëve se për ta ka jetë të parë, të dytë dhe të tretë. Jashtë politikës.

Por, nuk është kjo shtriqje psikologjike pse Blushi investon nëse merr drejtimin e Topit. Ai mund dhe duhet ta mundë Edi Ramën në një garë që kryetari i PS nuk ia dha, por edhe po t'ja kishte dhënë do ta kishte humbur.

Blush, kjo është 98-a jote! Rama e kapi rastin kur i erdhi e vetja. Ti e di.

Politiko.al

 

Të fundit