Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Fitorja e Faktoje.al, triumf i medias dhe gjykatave

Politiko 15 Janar 2021, 17:39

Fitorja e Faktoje.al, triumf i medias dhe gjykatave

Alfred Lela

Një vendim gjykate, pas një ankese të platformës mediatike Faktoje.al, shënon një hap të rëndësishëm në themelimin e një raporti të ri mes medias, qeverisë, sistemit gjyqësor dhe publikut në Shqipëri. Instalon nevojën për transparencë dhe rëndësinë e saj, si dhe pashmangshmërinë e së drejtës së publikut për t’u informuar mbi veprimtaritë qeveritare.

Pas një kërkese të thjeshtë dërguar të gjitha ministrive, Presidencës, Parlamentit dhe Kryeministrisë, Faktoje.al, një platformë që vëzhgon vërtetësinë e lajmeve dhe transparencën qeveritare, vetëm dy ministri, e Kulturës dhe Drejtësisë, kanë pranuar të bashkëpunojnë. Gazetarët e Faktoje, mbështetur në legjislacionin shqiptar, u kanë kërkuar institucioneve të dhëna për udhëtimet jashtë shtetit të ministrave dhe zyrtarëve të tjerë të lartë për të ndërtuar një pasqyrë të shpenzimeve.

Janë ndeshur me heshtjen, përveç dy ministrive të lartpërmendura, dhe me shpërfillje kur i janë drejtuar një hallke ndërmjetëse, që mbikqyr institucionet shtetërore për zbatimin e së drejtës për informim. Gjendur në këtë rrethim Faktoje ka paditur në gjykatë, e cila i ka dhënë të drejtë dhe u ka kërkuar institucioneve të lëshojnë të dhënat e kërkuara.

Ky vendim sa ç’flet mirë për gjykatën inkurajon median të mos reshtë së kërkuari materiale që vendosin para përgjegjësisë zyrtarët që paguhen me taksat e shqiptarëve, por edhe vendos në këndin e turpit Komisonierin e së Drejtës së Informimit, i cili me sa duket vetëm sa okupon zyra, rrogë dhe makinë, por nuk e bën punën.

Kjo sfidë që gjykata i bën, si Komisionerit ashtu dhe zyrtarëve të lartë të shtetit, është me rëndësi sidomos në dritën e zhvillimeve të fundit, ose thënë më saktë në errësirën e tyre, ku mungesa e transparencës qeveritare është fjala kyçe.

Dy ngjarje të javës së fundit e dëshmojnë këtë. Një darkë në Dubai, në një restorant të shtrenjtë mes një potpurie zyrtarësh të lartë të të gjithë pushteteve dhe një biznesmeni, për të cilën u dhanë shumë variante nga shumë krahë, dhe një koli vaksinash anti-Covid e cila gjithashtu u anonimizua, duke e bërë të paqartë synimin, dhuruesin dhe arsyet e fshehtësisë. Ka një parim në qeverisje, që vetëm për shkaqe të sigurisë kombëtare mund të kursehet informacioni, ndërsa në raste të tjera transparenca për publikun vjen gjithmonë e para.

Në Tiranë ndodh shpesh e kundërta. Çështja kombëtare është gati të flijohet në çdo pazar para fortifikimeve që i mvishen kazuseve qeveritare, atyre që do ta sikletosnin apo ulnin reputacionin e qeverisë në publik.

Gjykata e Republikës, në një vendim që ndoshta mund të shërbejë si precedent në të ardhmen, ka shpallur mosdakordësinë me këtë qasje. Është një lajm i mirë për të cilin duhet folur më shumë dhe më fort. Është një çështje e interesit publik që na prek të gjithëve.