Prokurori Përgjithshëm, Bushati: Ftesa e Ramës e pasinqertë

Analisti Andi Bushati ka komentuar debatin e ditëve të fundit rreth Prokurorit të Përgjithshëm. Bushati ka folur rreth qëndrimit të mazhorancës sa i takon zgjedhjes së një prokurori të Përgjithshëm të përkohshëm.

“Ke eksponentë të socialistëve që thonë nuk është tragjike, që kryeprokurori do zgjidhet pa procesin e vettingut. Pra duan të zgjedhin një prokuror të përgjithshëm pa kaluar nga sita e vettingut. Përveç kritereve ka disa parime bazë se si duhet zgjedhur. Në qoftë se do kishim një prokuror të përgjithshëm në detyrë, do kalonte nga ligji i vettingut dhe binte ai s’mund ë rrinte më Prokuror i Përgjithshëm. Po si mund të zgjidhet një prokuror pa kaluar nga sita e vettingut? Alibia tjetër është pse e bëni kaq të madhe sepse ky Prokuror për një muaj është. Por sa do zgjasin procedurat e emërimit. A mundemi ne që me shumicë të thjeshtë dhe pa vetting të zgjedhim një Prokuror që mund të rrijë në detyrë edhe 2 vjet. Ky prokuror nuk ka çelësat e kashtës por ka në dorë transferimin dhe pezullimin e prokurorëve. Është e shkruar e zeza mbi të bardhë në ligj që ky prokuror i përgjithshëm mund të pezullojë vartësit e tij. Këtu ka një problem. Nga problemi juridik dalim në një problem politik. Po bëhet kjo sepse është inteligjente apo se socialistët duan të venë një kryeprokuror për të mbrojtur veten e tyre?”, tha Bushati në rubrikën ‘Opinion’ në News 24.

Ndërkohë sa i takon ftesës që Rama i dërgoi Bashës për gjetjen e një emri të përbashkët për kryeprokurorin, analisti e ka cilësuar si një ftesë të pasinqertë.

“Ftesa e Ramës është ftesë e pasinqertë. Ti nuk mund të thuash hajde biem dakord bashkë por nëse nuk biem dakord bashkë unë e zgjedh vetëm. Por lexove letrën e Ramës ka një frazë që nuk shkon. ‘Unë dua të bisedoj me ty, por kam edhe votat vetë’. Kur i ke vazhdo vetë, s’ka nevojë për kompromis”, u shpreh Bushati.