Kryeministri Edi Rama ka përshëndetur sot me një foto nga Parku Kombëtar i Divjakës, aty ku moratoriumi i gjuetisë ka ndikuar pozitivisht në rehabilitimin e infrastrukturës natyrore.
Por Rama thotë një gjysmë të vërtetë teksa poston fotot e ndryshimeve nga 2013 dhe sot.
Ai thekson se e gjithë kjo mrekulli “mund të humbasë sërish nëse ndalemi sot, prandaj nuk do të rreshtim së punuari më fort dhe me vendosmëri për të ndërtuar Shqipërinë që duam”.
Në fakt, kryeministri ka të drejtë kur flet për rrezikun e zhdukjes së parkut të Karavastës, por jo nëse ai ndalet së ndërtuari, por nëse ndodh e kundërta dhe zbatohet projekti për ndërtimin e resortit gjigand në këtë zonë.
Ambientalistët kanë dhënë alarmin se projekti i Behgjet Pacollit që parashikon strehimin e 18 mijë turistëve në natë do të shkatërrojë përfundimisht parkun dhe do të sjellë zhdukjen e Pelikanit Kaçurrel. Prandaj Rama duhet të bëjë të kundërtën e asaj që thotë për të mos rrezikuar Karavastanë, të mos ndërtojë atje “Shqipërinë që duam”.
Reagimi i Ramës:
MIRËMËNGJES
dhe ju uroj një ditë të mbarë me këtë imazh të Parkut Kombëtar të Divjakës më 2013 dhe sot 🌹
Në këtë Ditë Ndërkombëtare të Biodiveristetit, kjo mrekulli e jona natyrore që deri 3 vjet e gjysmë më parë rrezikonim t’a humbisnim përfundimisht prej rrënimit e masakrimit çerekshekullor, është një ndër shembujt më të fortë se si me vendosmërinë tonë për të bërë shtet, jo vetëm e shpëtuam këtë thesar por e kthyem atë në një aset të jashtëzakonshëm për ekonominë lokale dhe kombëtare.
Falë ndalimit drastik të gjuetisë e ndërhyrjeve për rehabilitimin e infrastrukturës natyrore, mijëra vizitorë çdo vit, dhe çdo vit edhe më shumë, vijnë nga çdo kënd i botës për të vizituar Shtëpinë e Pelikanit Kaçurrel. Një specie në zhdukje globalisht që bashkë me Flamengot dhe të tjerë shpendë të veçantë, ka rigjetur tashmë në Karavasta oazin e rilindur të paqes dhe strehën e qetë për të jetuar e për t’u shumuar.
Por e gjitha kjo mund të humbasë sërish nëse ndalemi sot, prandaj nuk do të rreshtim së punuari më fort dhe me vendosmëri për të ndërtuar #ShqipërinëQëDuam 🇦🇱 🇪🇺 me #Shtet 💪 #Punë 👍 #Mirëqenie
Financuar Nga Bashkimi Europian
