Mjeku i njohur Dhimitër Kraja fiton betejën me Covid-19.
Sot, mjeku në pension ka lënë spitalin, njofton në FB ministrja e Shëndetësisë, Ogerta Manastirliu.
“Lajm shumë i mirë nga spitali infektiv. Sapo ka dalë i shëruar prof. Dhimitër Kraja!”, shkruan ministrja.
Kujtojmë se Kraja, një mjek në pension, u infektua pasi doli vullnetar, pas 48 viteve punë në Infektiv.
Profesor Kraja iu përgjigj i pari thirrjes së ministrisë për të ndihmuar kolegët në trajtimin e pacientëve të infektuar me COVID-19 në vendin tonë.
Në total deri tani janë shëruar 18 personel shëndetësor.
Reagimet:
Kryeministri Edi Rama: Lajm i mirë nga spitali infektiv:
Sapo ka dalë i shëruar prof. Dhimitër Kraja, i cili si pensionist iu përgjigj i pari apelit për t’u angazhuar në vijën e zjarrit, ku u plagos nga armiku…jetë të gjatë profesor!
Presidenti Ilir Meta: Shërimi i Profesor Dhimitër Krajës është një lajm i mirë që na gëzon të gjithëve!
Duke ju uruar shërim të shpejtë edhe të gjithë të prekurve nga pandemia COVID-19, theksoj edhe njëherë rëndësinë e forcimit të masave mbrojtëse për të gjithë mjekët, infermierët, sanitarët dhe personelin mbështetës, të cilët janë në vijën e parë të frontit, duke shërbyer me përkushtim, profesionalizëm dhe sakrifica në mbrojtje të shëndetit të çdo qytetari.
Kreu i PD, Lulzim Basha: Një lajm i gëzuar shërimi i prof. Dhimitër Krajës. Qeveria të rrisë testimet, duhet garantuar siguria ekipeve mjekësore.
Është një lajm i gëzuar për mua personalisht dhe për çdo bashkëqytetar shërimi i Prof. Dhimitër Krajës.
Mendimet dhe lutjet tona shkojnë për të gjithë personelin mjekësor që po përballet sot me COVID-19. Për të gjithë ata mjekë, laborantë, infermierë, sanitarë e shoferë ambulancash që rrezikojnë çdo ditë jetët e tyre në shërbim të qytetarëve. Në këto ditë të vështira ata meritojnë angazhimin serioz të qeverisë për të siguruar të gjitha mjetet e nevojshme mbrojtëse për ekipet mjekësore.
Transparenca është garanci dhe siguri si për stafet mjekësore ashtu dhe për të gjithë qytetarët. Testimi është mënyra më e suksesshme që po aplikohet sot për të identifikuar të prekurit nga COVID-19 dhe për të shkëputur zinxhirin e transmetimit.
Prandaj sa nuk është vonë qeveria duhet të zbatojë korrektësisht kërkesën standarte të OBSH: rritjen e numrit të testimeve.
Çdo shmangie nga kërkesat e përsëritura nga OBSH është papërgjegjshmëri e rëndë që jo vetëm fsheh të vërtetën por kushton shtrenjtë: Sa më pak testime, aq më pak persona të identifikuar, aq më gjatë shumë zgjatet zinxhiri i infeksionit, aq më gjatë vazhdon karantina dhe thellohet kriza ekonomike.
Duhet vepruar sot, çdo ditë e humbur na kushton jetë dhe shëndet!
Financuar Nga Bashkimi Europian
