Disa orë pas mbledhjes së Këshillit të Sigurisë Kombëtare, zyra për shtyp e Presidentit zbardhi detaje nga mbledhja e sotme. Sipas njoftimit zyrtar, në Mbledhjen e Këshillit të Sigurisë Kombëtare thirrur nga Presidenti Meta, morën pjesë kreu i Kuvendit Gramoz Ruçi, Kryeministri Rama, krydemokrati Basha dhe ministra të kabinetit qeveritar. Sipas njoftimit, edhe mbledhja e sotme e Këshillit të Sigurisë Kombëtare pati në fokus situatën nga koronavirusi.
“Çështjet kryesore që u diskutuan ishin vlerësimi mbi situatën aktuale të pandemisë, masat që po ndërmerren për përballimin e pasojave ekonomike dhe sociale, zhvillimi i procesit arsimor dhe strategjia e planifikuar për përfundimin e vitit akademik 2019-2020, si dhe ndryshimet e propozuara në Kodin Penal. Kryeministri Rama dhe ministrat përgjegjës informuan për masat e marra për përballimin e krizës shëndetësore dhe social-ekonomike, si dhe për menaxhimin e mëtejshëm të situatës. Kryetari i Kuvendit z. Ruçi shprehu angazhimin për përmbushjen e detyrimeve të Kuvendit në këtë situatë.
Kryetari i Partisë Demokratike z. Basha shprehu pikëpamjet dhe sugjerimet e opozitës për ta tejkaluar këtë pandemi me pasoja sa më të lehta për qytetarët dhe ekonominë e vendit. Presidenti Meta vlerësoi rëndësinë e rritjes të efikasitetit të masave, përmes ndërgjegjësimit, transparencës, gjithëpërfshirjes dhe rritjes së frymës së bashkëpunimit, pasi objektivi madhor i përbashkët është mbrojtja e shëndetit të qytetarëve, i ekonomisë kombëtare, si dhe përmbyllja e vitit shkollor”, thuhet në njoftimin e Presidentit.
Ndërkohë, Meta, me anë të një postimi në Facebook, u shpreh se “mbledhja u mbajt në frymë bashkëpunimi”. Mbledhja u zhvillua në një frymë bashkëpunimi, dhe për këtë dua të falenderoj Kryetarin e Kuvendit, z.Gramoz Ruçi, Kryeministrin z.Edi Rama dhe Kryetarin e Partisë Demokratike z.Lulzim Basha. Vlerësova rëndësinë e rritjes të efikasitetit të masave, përmes ndërgjegjësimit, transparencës, gjithëpërfshirjes dhe rritjes së frymës së bashkëpunimit, pasi objektivi madhor i përbashkët është mbrojtja e shëndetit të qytetarëve, i ekonomisë kombëtare, si dhe përmbyllja e vitit shkollor. Falenderoj qytetarët për mirëkuptimin dhe bashkëpunimin e dëshmuar, që duhet të vijojë, në interes të përbashkët. Sa më efikas të jetë ky bashkëpunim, aq më shpejt do t’i rikthehemi normalitetit dhe jetës plot gjallëri. Së bashku do t’ia dalim”, shkruan Meta.
Këtë mbledhje e komentoi dhe kryeministri Edi Rama, i cili e quajti ‘mbledhje të gjatë por të dobishme’, duke vlerësuar komunikimin konstruktiv gjatë saj. “Mbledhje e gjatë por e dobishme e Këshillit të Sigurisë Kombëtare dhe një shkëmbim i hapur opinionesh me Presidentin e Republikës & kryetarin e PD për hapjen graduale të aktivitetit në javët në vijim! Sikur komunikimi publik të ishte kaq pozitiv, pollitika do ishte shumë ndryshe”, tha Rama në Twitter.
Financuar Nga Bashkimi Europian
