Hakmarrja e Ramës ndaj Kim dhe presioni mbi drejtësinë/ A ishte korrekte pjesmarrja e tyre në 30 vjetorin e Gj.K?

Shënohen 30 vite nga krijimi i Gjykatës Kushtetuese, e cila pas tre dekadash ka ende problematika, si psh., vakancat e krijuara nga procesi i vettingut.

Në aktivitetin që përkonte me 30 vjetorin e saj, nuk munguan politikanët, si presidenti Bajram Begaj apo kryeministri Edi Rama. Ndërkohë që të pranishëm ishin edhe ambasadorë të huaj, që sërish përcollën mesazhe të forta për drejtësinë shqiptare.

Edhe pse nuk e pranon, kryeministri Edi Rama vazhdon të bëjë presion ndaj drejtësisë. Në deklaratën e sotme, ai “dha mend” se si duhet të veprojnë prokurorët dhe gjyqtarët, duke komentuar edhe vendimet e së kaluarës.

Rama madje sugjeroi që jo çdo çështje duhet të shkojë në Gjykatën Kushtetuese. Kjo nuk është hera e parë që Rama përfshihet në punët e gjyqësorit. Shpesh ai ka bërë thirrje që të hetohen kundërshtarët e tij politike.

“Sot përgjatë qenies së saj 30 vjeçare, Gjykata Kushtetuese është një ngrehinë me hije dhe dritë me vula vendimesh të diskutueshme. Pastaj merr vendime që janë drobitëse për ata që lexojnë deri në fund duke mos arritur atë ekuilibrin e artë”, u shpreh Rama.

Duke qenë se ndërkombëtarët kanë dalë me deklarata të forta për drejtësinë, Rama nuk harroi “të hakmerrej”. Ai kritikoi komentet e ambasadorëve për vendimet e gjyqësorit.

“Kreu i pushtetit ekzekutiv para një plateje juristësh dhe gjykatësish, pra pushtetit gjyqësor pa harruar e veshët e sytë e diplomatëve të huaj të cilët kur vjen fjala te drejtësia duket se nuk ndihen të huaj në territoret e saj, madje kanë dhe një luks të vecantë që kur të duan mund ta ndajnë me publikun gëzinin ose hidhërimin për vendimet e gjykatave, çkla për mua e autoritetet e këtij shteti nuk është e këshillueshme, le më e imitueshme. Fjalim kritik mbetet po aq i pakëshillueshëm sa i imitimi i diplomateve kur emocionohen publikisht per vendimet e gjykatave”, deklaroi kryeministri shqiptar.

Në aktivitetin që u mbajt sot ambasadorët sërish dhanë mesazhe të rëndësishme. Ndërsa presidenti Begaj kërkoi që të zgjidhen problematikat e evidentuara nga BE.  

Por sa korrekte është pjesmarrja e aktorëve politikë dhe ambasadorëve në aktivitete të institucioneve të drejtësisë?

Pas këtij aktiviteti ka reaguar ish-ministri i Drejtësisë, Ylli Manjani thotë se një gjë e tillë nuk ndodh në asnjë vend demokratik. Sipas tij, kjo bën të pamundur që në një rast të mundëshëm, të ketë gjyqtarë që të hetojnë kryeministrin.

Më tej shton se, ambasadorja Kim duhet të japë shpejgime dhe të tregojë vetëm një rast që udhëheqësi i Amerikës të mbajë fjalime para njerëzve të drejtësisë.