75-vjetori i çlirimit të Tiranës është përkujtuar e ndarë nga politika, ashtu si shumë ngjarje të tjera që lidhen me Luftën e Dytë Botërore.
Fillimisht, kreu i Partisë Demokratike, Lulzim Basha zhvilloi homazhe në sheshin para Institutit të ish- Përndjekurve Politikë dhe ka vendosur kurora me lule pranë memorialit.
Ndërkohë, që bashkia e Tiranës ka organizuar një sërë aktivitetesh për këtë ditë, përfaqësues të mazhorancës, si zv.kryeministri Erion Braçe, kreu i Grupit Parlamentar të PS, Taulant Balla, si dhe kryebashkiaku Erion Veliaj mbajtën fjalët e tyre përshëndetëse në një ceremoni tjetër përkujtimore pranë monumentit të Ushtarit të Panjohur.
Lufta për çlirimin e Tiranës u zhvillua në fund të tetorit deri më 17 nëntor të vitit 1944 dhe shënon aktin më të rëndësishëm politik e ushtarak pasi kurorëzoi fitoren e Luftës Antifashiste Nacionalçlirimtare. Lufta për çlirimin e Tiranës ishte operacioni më i madh i shkallës operativo-strategjike i zhvilluar nga shqiptarët për çlirimin e qyteteve.
Financuar Nga Bashkimi Europian
