"Ping-pongu" i Autoritetit të Konkurrencës me Blendi Gonxhen për çmimin e patentave

 “Çmimi i patentës do të dyfishohet”, ishte ky lajmi që tronditi të gjithë ata qytetarë të cilit nuk e kishin bërë patentën, sidomos kur lexuan se pajisja me leje drejtimi të tipit B, leja e drejtimit masive që nevojitet për të drejtuar një mjet, do të kushtojë 85 mijë lekë nga 35 mijë lekë që ishte aktualisht.

Nisur nga njoftimet e marrë, qindra qytetarë u dyndën për t’u regjistruar në kursin e patentave pasi “pas datës 1 mars’ do hynte në fuqi ligji i ri, pas një marrëveshje të realizaur në datën 13.02.2023, ndërmjet Drejtorisë së Përgjithshme të Shërbimeve të Transportit Rrugor, Shoqatës “Kombëtare të Autoshkollave”, Shoqatës së Autoshkollave “Siguria në rrugë” dhe Drejtorisë së Përgjithshme të Tatimeve.

Ndërkohë “vigani-shkurtabiqi”, është “loja” që thuajse prej një muaji po luhet mes Autoritetit të Konkurrencës dhe DPSHTRR-së së drejtuar nga Blendi Gonxhe.

Autoriteti i Konkurrencës më 1 mars vendosi të ndalojë rritjen e çmimit të patentës me 85 mijë lekë të reja, duke rrëzuar marrëveshjen mes DPSHTRR-së së dhe Shoqatës së Autoshkollave.

“Akt Marrëveshja për përcaktimin e tarifës së pagesës dhe kostos minimale fiskale për përgatitjen dhe pajisjen me leje drejtimi, nëpërmjet përcaktimit të tarifës minimale ka rrezik eminent të sjellë një dëm të rëndë dhe të pariparueshëm për konkurrencën në ofrimin e këtyre shërbimeve, duke reduktuar seriozisht përfitimet që tregjet konkurruese ofrojnë për konsumatorët”, deklaronte Autoriteti i Konkurrencës.

Por, ky vendim duket se nuk e trembi Blendi Gonxhen i cili në një interviste tha se 100 deri ne 200 euro më shumë janë të domosdoshme për një test të plotë e jo fiktiv.

“Nuk jemi tërhequr, me Autoritet, pa Autoritet ajo do të eci para. Nuk diskutohet që jo vetëm që nuk rrezikon konkurrencën kjo që po bëjmë ne në mënyrë të pariparueshme, por në mënyrë të pariparueshme rrezikohej konkurrenca nga ajo që nuk po bënte autoriteti dhe autoritetet e tjera që nuk kanë punuar në vite për të mbrojtur konkurrencën e ndershme. Nuk mund të ulim kokën në rërë si struci e të themi që jemi të varfër, ndërkohë që ne jemi shumë të pasur, paguam 403 milionë dollarë. Po kur vjen puna nuk duam ta bëjmë 100-200 euro më shumë atë testin e ta bëjmë të plotë, të mos jetë fiktiv. Pra, dua të them që ne nuk i ikim dot kësaj pune. Kjo punë kërkon edukatë, kërkon kulturë”, tha Gonxhja.

Ndërkaq ditën e sotme Autoriteti i Konkurrencës ka rrëzuar marrëveshjen për rritjen e çmimit të patentës.

Vendimi është marrë në mbledhjen e kësaj të premteje, teksa thuhet se akt marrëveshja, me hyrjen në fuqi do të çojë në praktika të njëjta në çmimet/tarifat e pagesës për përgatitjen dhe fitimin e kategorisë së leje drejtimit, dëshmisë ose certifikatës, duke penguar, kufizuar dhe shtrembëruar konkurrencën në treg.

“Në përfundim të vlerësimit ligjor, u konstatua se Akt Marrëveshja nr.2729 prot., datë 13.02.2023, lidhur ndërmjet grupeve të interesit përfaqësues të Autoshkollave, DPSHTRR-së dhe DPT-së, është një marrëveshje e ndaluar në vetvete për nga objekti, në kuptim të nenit 4, pika 1, gërma a), të ligjit nr. 9121/2003, pasi me hyrjen në fuqi do të çojë në praktika të njëjta në çmimet/tarifat e pagesës për përgatitjen dhe fitimin e kategorisë së leje drejtimit, dëshmisë ose certifikatës, duke penguar, kufizuar dhe shtrembëruar konkurrencën në treg.  Si e tillë kjo Akt Marrëveshje, në kuptim të nenit 4, pika 2, të ligjit nr. 9121/2003, është e ndaluar. Sa më sipër, Komisioni i Konkurrencës, me vendimin nr. 970, datë 24.03.2023 vendosi:

Akt Marrëveshja nr. 2729 prot., datë 13.02.2023, e lidhur ndërmjet palëve: Drejtoria e Përgjithshme e Shërbimeve të Transportit Rrugor, Shoqata “Kombëtare e Autoshkollave”, Shoqata e Autoshkollave “Siguria në rrugë” dhe Drejtoria e Përgjithshme e Tatimeve, vlerësohet si një akt marrëveshje në kundërshtim me nenin 4 të ligjit 9121.2003, “Për mbrojtjen e konkurrencës”, thuhet në vendimin e marrë ditën e sotme.

Mirëpo për të dytën herë brenda pak kohësh, Autoriteti i Konkurrencës konstatoi paligjshmëri në treg, por nuk e pa të arsyeshme të vendosë masa ndëshkuese.

 

“Po nëse ky vendim do merrte jetë?”

Nëse çmimi aktual i patentës do arrij shifrat 850 atëhërë në  krahasim me vendet fqinje, Shqipëria rezulton se e ka me të lartë çmimin bazë për pajisjen me një leje drejtimi.

Në Kosovë, ky kurs kushton 574 euro, përfshirë certifikatat shëndetësore e deri tek aplikimi për marrjen e kartës. Në Maqedoninë e Veriut, patenta mund të merret për vetëm 520 euro, patentën për klasin B.

Në rajon Serbia është një nga vendet që ka çmimet më të larta të marrjes së patentës, por sërish nuk e kalon Shqipërinë. Kostoja për trajnimin e plotë të një shoferi të ri në teori dhe praktikë është rreth 630 euro.

Ndërsa në krahasim me Italinë dhe Greqinë, vende anëtare të Bashkimit Europian, shifra është shumë herë më e lartë. Kursantët duhet të paguajnë mbi 1000 euro, për teorinë dhe praktikën.

 

Ndryshimet në Kodin Rrugor, të rinjtë nuk do lejohen me makina të mëdha dhe shpejtësi

Të gjithë drejtuesit e rinj të mjeteve, që sapo janë pajisur me patentë, nuk mund të ngasin makina me kubik të lartë, ndër to “Mercedes Benz”, “Audi” apo “Porsche”, deri në 2 vjet.

Kjo kategori shoferësh do të mund të ngasin modele makinash me fuqi më të vogël si “Fiat 500”, “Ford Fiesta”, “Renault Tëingo”, “Opel Corsa”, etj.

Ky është një nga ndryshimet e Kodit Rrugor që u miratua nga ligjvënësit në parlament.

“Është një punë e mire duke kufizuar adrenalinën e grupmoshës së re. duke marrë një mjet me fuqi të vogël motorike detyrimisht ata nuk do të ecin dot me shpejtësi të lartë. Në këtë këndvështrim më vjen mirë që arritëm të bëjmë një përafrim ashtu siç e ka bashkimi europian”, shprehet Artur Sulçe, ekspert i aksidenteve rrugore.

Një tjetër ndryshim ka të bëjë me afatet e rinovimit të patentës, nga 10 vite që është aktualisht,  në 15 vite deri në moshën 70 vjeç. Edhe për lejet e drejtimit profesionale afatet e rinovimit do të jenë çdo 5 vite deri në moshën 70 vjeç, e jo më deri në 65 vjeç.

Po ashtu sipas ndryshimeve të miratuara do të zgjatet e drejta për ushtrimin e profesionit të Instruktorit të Autoshkollës deri në 70 vjeç, nga 65 vjeç që është.