Ina Xhani
Paralajmërim, dy pika: nëse jeni tipa të ndjeshëm, a.k.a fansa të PS, atëherë mos lexoni më tutje.
Pronarët e Tiranës
“FOTOT E DITËS: Lali Eri paska pas’ të drejtë, më mirë më 14 në Elbasan dhe më 17 në Tiranë. Kjo është Shqipëria dhe Tirana e njerëzve të zakonshëm🇦🇱🇪🇺🇺🇸. Ata dje i kishim për të mos harruar kurrë çfarë përfaqëson Saliu&Luli&Mona👎,” është shprehur në faqen e tij në Facebook deputeti socialist Taulant Balla. Ashtu eee, Tao? E harrove protestën e 2011 para KQZ?
“Tirana e vërtetë, është e atyre që e duan qytetin, që duan familjen e tyre 👨👩👧👦 më shumë sesa partinë, që duan që ky vend të ecë përpara 😊 më shumë sesa ata që e shkatërrojnë.❌”Në të njëjtën linjë ka qënë dhe kryetari i bashkisë Tiranë, ai që në kohë zgjedhjesh nuk lë grup të margjinalizuar pa puthur e mbajtur hopa, por pasi zgjidhet bën “kush jeni se kam ndërruar celularin”. Lali, e kujt ishte Tirana më 21 Janar, 2011?
“Ja si pr😉teston Tir❤n” Që të mos ngelet pas kolegëve, dhe të duket keq para Skënderbeut të saj, edhe Elisa Spiropali ka nxjerrë në Facebook “Tiranën e vërtetë” … sigurisht, pasi është lustruar njëherë nga filtrat.
I gjithë faji është i…
“Vesi del me shpirtin! Goditet me tritol linja e transmetimit 400 KW në Laç dhe pas 30 vjetësh kapituj sherresh e rrëmujash të nxitura nga e njëjta dorë, dihet kush u bie shtyllave nga tërbimi i dëshpërimit! E keni kot, hidhuni përpjetë sa të doni, këtë vend mbrapa dot s’e ktheni”, ka reaguar në Twitter Spiropali në lidhje me ngjarjen e Laçit , ku i është vendosur tritol një linje transmetimi të energjisë elektrike. Dmth, PD-ja i ka të gjitha fajet, si kur është në pushtet, si kur është në opozitë? Elisa, siç do thoshte dhe kryeministri ynë…What the fuck!!!!!
S’jena mo
“Po boll o boll, boll se s’kam asgjë tjetër përveç larjes së jashtënxjerrjeve tuaja nēpër botë boll! Opozitë e katandisur në një tufë qorre që mësyn fizikisht rrugëve dhe bën politikë duke sajuar kriza për vendin e sëmundje për kundërshtarin! O pika që s’ju bie kur thonë plakat”, ka reaguar Rama në Twitter në lidhje me protestën e 16 marsit. Që të sqarohemi pak: kur dalin për ty janë popull i thjeshtë që i ka shkuar thika në palcë; kur dalin kundra teje janë një tufë qorrash… kuptova!
Piari vs. Shëndetit
Ministrja e Shëndetësisë Ogerta Manastarliu javën që shkoi vizitoi një prej pacientëve që ka ka kryer transplant të veshkës me financim nga shteti. Më saktë, ministrja informoi pacienten se kishte kryer transplant veshke të financuar nga shteti. Se pacientja nuk e dinte, me siguri ka kujtuar se sa kishte dalë nga mani/pedi special.
(P.S. E dashur ministre, kur të jesh herë tjetër në prani të një pacienti që ka kryer transplant, përdorë mbrojtëse goje. Pacientëve të transplantit ju dobësohet imuniteti që organizmi të mos refuzojë organin e ri, dhe kjo i bën ata më të rrezikuar ndaj infeksioneve….të paktën kështu kam parë nëpër filma, se mos di gjë unë)
Drama Prez
“Jam gati i pari të sakrifikoj në emër të një zgjidhje politike për të dyja ekstremet, që nga dorëzimi i mandatit si president pasi të sigurohem se vendi ka një zgjidhje politike e parimore, kushtetuese, e deri te sakrifikimi i jetës sime si Salvador Allende për të ndaluar instalimin e një junte që mund ta kthente Shqipërinë 30 vite pas”, është shprehur Presidenti i Republikës.
Mall pa zot
“Ne kemi vendosur të zgjerojmë ujërat tona territoriale në Detin Jon, si pjesë e përkufizimit të Zonës Ekonomike Ekskluzive me Italinë dhe Shqipërinë dhe në rajonet e tjera. Ne besojmë se është e patjetërsueshme e drejta jonë sovrane për të zgjeruar ujërat tona territoriale”, është shprehur ministri i jashtëm George Katrougalos.
Edhe deputet, edhe humorist
“Ne politikanët do e çojmë Shqipërinë në Europë”, është shprehuar në foltoren e Parlamentit Enver Roshi, deputeti i ri i partisë Lëvizja Socialiste për Integrim.
Njeri me parime (0)
“Ç’vlerë ka që është apo s’është për mua? Ajo ka ndodhur ato vite dhe ka funksionuar. Problemi është që unë nuk kam qenë ndonjëherë komunist me teserë as atëherë, as tani. Kam qenë shumë kritik me atë sistem, por nuk e shaj Enver Hoxhën sepse ai ka vdekur se nuk jam legen”, është shprehur poeti Agron Dukan në lidhje më diktatorin.
Discussion about this post