Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Kush do t'i mungojë protestës së 27 janarit?

Politiko 26 Janar 2018, 11:02

Kush do t'i mungojë protestës së 27 janarit?

Zef Zefi

Do mungojë kushtrimi: "largohu përpara se të shkelim mbi kufoma..." dhe "...sikur 13 apo 30 mijë të vdesin, do ta shporrim...". Krye/"trimi", arkitekti dhe instaluesi i krimit, mjerimit dhe mallkimit shqiptar, nuk do të jetë duke ndërsyer me gjeste turmat kundër Policisë së Shtetit, kundër institucioneve të vendit. Protestës demokratike do i mungojë zv/kryetrimi Tahiri me megafon, duke ekzaltuar, istiguar e shtyrë balilët, bilalët, shullazët, frroksat, roshsat e noksat, kundër ushtarakëve që mbajnë rrobën dhe stemën e Republikës në ballë dhe ruajnë paprekshmërinë e simboleve të vendit. As Veliaj që lyen me bojë kokat e protestuesve për të shpërndarë panik e terror ndër protestues dhe dezinformim për mediat e vëzhguesit e huaj, nuk do të jetë.

Sigurisht, aty nuk do të jetë as reparti i jeniçerëve të ruçizmit me kokordhokë përjashta, hunj, gurë e makina sulmi, siç ka për të munguar "sportistja" e arsimit me kolegët, që u çon ujë kuqalashëve të lyer me bojë si nanë-dranja... Doshizmi, gjush'dakizmi i borderove duke u shpëndarë sulmuesve lekë, qofte të pjekura e "S" të kuqe, nuk kanë pse të protestojnë.

As Balla i ndezjes së gomave të makinave e mbeturinave, nuk ka për të qenë në protestën demokratike. Të gjitha spiropalet, gjoshkat e kokoshkat, do të veçohen në odën e "pallatit" duke luajtur me kukullën "skenderbuçkua dhe bubi kaçurrel".

Do të mungojë gjithashtu Ahmet-sulltani i Financave që kollofiti llokmën e radhës nga këstet e fundit të vuajtjeve të aristokracisë së vërtetë shqiptare, shkaktuar nga baballarët e qeverisë së sotme social-komuniste.

Protestës së popullit do t'i mungojë Ministri i papunë i Diasporës, i më shumë se 1.5 milion atdhemohuarve.

Do mungojnë ndotësit e opozitës, që nënkupton të shpresës shqiptare. Ata nuk do të jenë në protestën popullore antikrim. Ata do të montojnë aparatet monitoruese, fotografike e tv-të e tyre në llozhat mediatike, për të foto-skriptuar periferinë fizike të protestuesve. Ata dhe relativistët e oportunizmit duke lëpirë "akulloren qeveritare, me aparaturat e tyre të fjalës do të errësojnë pjesëmarrjen dhe kumtin e protestës, dmth të shpresës.

Lulzim Bashës iu desh t'ia përsëriste mbi dhjetë herë kryeopinionistit klanist frazën se "...rezistenca me të gjitha mjetet demokratike e kushtetuese, është detyrë dhe mision i opozitës për të shpëtuar minimalisht vdekjen e shpresave të qytetarëve shqiptarë...," ndonëse kryeopinionisti i pohoi me cinizëm qesharak se nuk donte ta kuptonte këtë.

Nëpunësve, burokratëve, të pakënaqurve me pusht-tetin e senjorëve të tyre, gjithashtu do t'u shpërndahen "lëpirëset" e rrogës dhe do të urdhërohen që maksimumi të dalin deri te ballkoni i zyrës. Siç nuk do të jetë çudi që ndonjë "kazan" do të blihet nga portofoli i trashur i krimit, siç bëri me zgjedhjet.

Mbas Shëndetësisë falas, mbas Policisë që duam, mbas reformave politiko administrativo-jugosllaviste, erdoganiste, putiniziniste dhe kriminalizimit të shtetit, protestës popullore do t'i mungojnë edhe 500 mijë shqiptarë, që do të thotë:

Protestës demokratike do t'i mungojnë 11 qytete sa Saranda, 20 qytete sa Gjirokastra, 5 qytete sa Durrësi, e sa Shkodra, 9 qytete sa Vlora, 50 qytete sa Kukësi, apo 100 qytete sa Tepelena, Rubiku e Cërriku; të deportuar, të shpërngulur nga Shqipëria me dhunë, vetëm për katër vjet prej socializmit të rilindur.

Gjithashtu, protestës demokratike do t'i mungojnë edhe 400 mijë qytetarë të tjerë që dergjen burgjeve të barbarisë qeveritare, sepse kanë konsumuar veprën "kriminale" të varfërisë ekstreme, dhe nuk paguajnë taksat e rritura për dritat e munguara, ujin e munguar dhe ajrin.

Viktor Hygo më 1852, tek artikulli "Napoleoni i vockël" duke komentuar kështu rezultatin referendar mbas Grushtit të Shtetit napoleonik të vitit 1851, shkroi edhe këtë frazë pitagoriane me nëntekst politik, "...hipotenuza eshtë më e gjatë se brinjët e tjera të trekëndëshit këndrejtë, po sidoqoftë më e shkurtër se shuma e tyre..." Ndaj, ndotja dhe pengimi kriminal i opozitës qytetare do të bëhet mision i pamundur, ashtu si nuk do të vdesin shpresat e shqiptarve duke i lënë ato peng në duart e kriminelëve të pushtetëruar.

Politiko.al