Mirëmëngjes!
“Posta e mëngjesit” ju sjell një blic lajmesh kryesore ndodhur dje në Shqipëri. Klikoni në hiperlinqet blu nëse doni të lexoni më shumë. Nëse e doni ‘Postën’ në emailin tuaj na shkruani në [email protected]
- Ndarja e Shqipërisë në 4 rajone, ç’është projektligji që u miratua në Kuvend pa zhurmë, duke përfituar nga debatet për ndryshimet kushtetuese.
E lidhur: Edi Rama e nisi me organizimin e partisë ndarjen e Shqipërisë në rajone: Veriun e kam unë, Balla dhe Ruçi…
- Intervista në Politiko: Historia e shqiptares rezidente në Liban: Si i shpëtoi shpërthimit apokaliptik në Bejrut, rastësitë që e detyruan të vijë në Tiranë 24 orë para ngjarjes që tronditi botën.
- Shfryhen ndihmat për tërmetin, fatura 500 mln euro po financohet nga buxheti. Fatura e rindërtimit që duhet përballuar nga buxheti u rrit më shumë se dyfishi nga fillimi i janarit duke shkuar në një total prej 500 milionë eurosh nga 217 milionë euro që ishin programuar në janar.
- Përmirësohet gjendja shëndetësore e Blerta Josifit, të mbijetuarës së tragjedisë që tronditi mbarë opinionin publik në Kombinat disa javë më parë. Mësohet se pas trajtimit për disa javë në spitalin psikiatrik, të afërmit e 34-vjeçares e kanë nxjerrë dhe po mbahet nën monitorim pranë tyre.
- Tri ditë pas vrasjes së taksistit 71-vjeçar Abdulla Budlla, janë vënë në pranga dy vëllezër, të dyshuari si autorë të krimit.
- Organizata e Kombeve të Bashkuara ka publikuar planin e përgjigjes socio-ekonomike dhe të rimëkëmbjes ndaj COVID-19 në Shqipëri. Plani i detajuar ka një buxhet prej më shumë se 97 milionë dollarë për 12-18 muajt e ardhshëm.
- Një rekord viktimash dhe rastesh të infektuara nga koronavirusi janë shënuar dje në Shqipëri. Ministria e Shëndetësisë bën me dije se 6 persona kanë humbur jetën gjatë 24 orëve të fundit. Ndërkaq 127 të tjerë kanë rezultuar të infektuar.
- Grupi parlamentar demokrat ka kallëzuar në SPAK ministrin e Brendshëm Sandër Lleshaj dhe ministren e Mbrojtjes Olta Xhacka, për skandalin e tenderit të uniformave të Policisë së Shtetit.
- A duhet të kandidojë sërish Berisha për PD në 2021-shin? Anëtari i Komisionit të Vlerësimit të kandidatëve për deputetë në PD, Genc Ruli thotë: Ish-kryeministri e ka marrë lavdinë.
- Në Pogradec, një 44-vjeçar i dyshuar se vuante nga probleme mendore ka vrarë me thikë nënën në banesë. Detaje të reja nga vrasja makabre tregojnë se autori i krimit pas aktit e kishte varur kokën e të ëmës tek dera e shtëpisë, ndërsa në dëshmine e tij, i ftohtë, s’ka treguar asnjëlloj pendese.
- Princi Leka ka kujtuar 105-vjetorin e lindjes së Mbretëreshës Geraldinë, e quajtur ndryshe si “Trëndafili i bardhë”. Përmes një shkrimi emocionues në rrjetet sociale, nipi i mbretëreshës, Princ Leka Zogu, i bën një dedikim gjyshes ose sikurse e quan “shenjtoren e pashpallur”.
Financuar Nga Bashkimi Europian
